आमचा हेडमास्तर ‘पॉवर’ बाज आहे. कारण ‘पॉवर’ इज ए पवार आणि पवार इज ए ‘पॉवर’. पवार साहेबांनी हे गुगली टाकली ना तर केंद्रात महाविकास आघाडीचे सरकार येईल. पवार यांच्या आदेशानुसार आम्ही संयमानं बोलत आहोत. मात्र आमच्यावर वैयक्तिक पातळीवरची टीका करण्यापूर्वी जरा विचार करा. लोकसभेची निवडणूक ही निवडणुकीच्या पद्धतीनेच लढवा. ‘चार्टर्ड प्लेन’ने कोण कुठे जातं, हे आम्हाला चांगलंच माहित आहे, असा हल्लाबोल नगर दक्षिण लोकसभा मतदारसंघातल्या महाविकास आघाडीचे उमेदवार निलेश लंके यांनी खासदार सुजय विखे यांचं नाव न घेता केला.
लोकसभा निवडणुकीच्या पार्श्वभूमीवर राहुरी तालुक्यात आयोजित करण्यात आलेल्या जाहीर सभेत लंके बोलत होते. ते म्हणाले, ‘ या मतदारसंघात 50 वर्षांपासून त्यांची सत्ता आहे, असं तेच सांगताहेत. मग या पन्नास वर्षांच्या प्रदीर्घ कालखंडामध्ये त्यांनी किमान दहा – वीस हजार बेरोजगारांना रोजगार उपलब्ध करून का दिला नाही? नुसत्याच विकासाच्या गप्पा मारायच्या याला काही अर्थ नाही.
त्यांनी रोजगार निर्मिती तर केली नाहीच. राहुरी साखर कारखाना बंद पाडला. मुळा – प्रवरा वीज पुरवठा कंपनी बंद पाडली. नुसती बंद पडली नाही तर शासनाचे 2 हजार 200 कोटी रुपये थकवले. संस्था उभ्या करण्याऐवजी त्यांनी संस्था संपविण्याचा घाट घातला. त्यामुळे आता या निवडणुकीत यांना संपवा’. यावेळी तुतारीचा प्रचंड निनाद करण्यात आला.