नगर दक्षिण लोकसभा मतदारसंघातल्या महायुतीचे उमेदवार खासदार डॉ. सुजय विखे यांच्या प्रचारार्थ अहिल्यानगरच्या (अहमदनगर) संत निरंकारी भवन परिसरात आयोजित करण्यात आलेल्या सभेत उपस्थित असलेल्या लाखो मतदारांना राष्ट्रवादी काँग्रेस अजित पवार गटाचे नेते आणि नगर शहराचे आमदार संग्राम जगताप यांनी संबोधित केलं. यावेळी बोलताना ते म्हणाले, ‘पंतप्रधान नरेंद्र मोदी ही देशाची महाशक्ती आहे. त्यामुळे या निवडणुकीत नगर दक्षिण लोकसभा मतदारसंघातून डॉक्टर सुजय विखे आणि उत्तर नगर लोकसभा मतदारसंघातून सदाशिव लोखंडे यांना प्रचंड मताधिक्यानं निवडून देत पंतप्रधान मोदी यांचे हात बळकट करा’.
आमदार जगताप म्हणाले, ‘निवडणुकीत आरोप प्रत्यारोप होतच असतात. त्याकडे लक्ष न देता आपल्या देशाचा जवान जसं ऊन, वारा आणि पावसाची पर्वा न करता देशाच्या सीमेवर सतत पहारा देत असतो, त्या जवानाच्या धैर्याची मनात आठवण ठेवून आपल्याला उन्हाचा किती त्रास झाला तरी आपण या निवडणुकीत जास्तीत जास्त संख्येनं मतदान करा आणि देशाच्या महाशक्तीचे हात बळकट करा’.
यावेळी राज्याचे उपमुख्यमंत्री देवेंद्र फडणवीस, पालकमंत्री राधाकृष्ण विखे, खासदार डॉक्टर सुजय विखे, खासदार सदाशिव लोखंडे, माजी मंत्री प्रा. राम शिंदे, माजी मंत्री शिवाजी कर्डिले, आमदार मोनिका राजळे आदींसह भाजपचे पदाधिकारी कार्यकर्ते आणि मतदार मोठ्या संख्येनं उपस्थित होते.
