नगर दक्षिण लोकसभा मतदारसंघात येत्या काही दिवसांमध्ये मोठ्या गंमतीशीर घटना घडणार आहेत. त्यापैकीच एक घटना आज (दि. २६) घडली. या निवडणुकीत उमेदवारी अर्ज सादर करताना ही घटना प्रकर्षानं समोर आली. या निवडणुकीत महाविकास आघाडीचे निलेश ज्ञानदेव लंके हे खासदार डॉ. विखे यांच्या विरोधात उभे असताना दुसरे एक निलेश साहेबराव लंके हे कामोठे, वाशी, नवी मुंबईत व्यवसायानिमित्त स्थायिक झालेले आणि पारनेरच्या मतदार यादीत नाव असलेले निलेश साहेबराव लंके हे उमेदवार या लोकसभेच्या निवडणूक रिंगणात आहेत.
दरम्यान, यासंदर्भात महाविकास आघाडीच्या नेत्यांनी आज (दि. २६) पत्रकार परिषद घेऊन खा. डॉ. विखे यांच्यावर गंभीर आरोप केला. निलेश साहेबराव लंके हा डमी उमेदवार खासदार डॉक्टर विखे यांनीच दिला असल्याचा आरोप राष्ट्रवादी काँग्रेसचे जिल्हाध्यक्ष राजेंद्र फाळके यांनी केला आहे. या पत्रकार परिषदेप्रसंगी शिवसेनेचे (उबाठा) दक्षिण जिल्हाप्रमुख प्रा. शशिकांत गाडे उपस्थित होते.
यावेळी पत्रकारांशी बोलताना राष्ट्रवादीचे फाळके म्हणाले, की ‘खासदार डॉ. विखे यांची डिग्रीसुद्धा डमी असून त्यांच्या संपत्तीच्या वाटप प्रक्रियेत डमी वारसदार उभा केला असल्याचा आरोप त्यांचे चुलते अशोक विखे यांनी केला आहे. या निलेश साहेबराव लंके यांच्या उमेदवारीबद्दल आमचा काहीही आक्षेप नाही. मात्र या लंके यांच्याआडून खा. डॉ. विखे हे आम्हाला अडचणीत आणण्याचा प्रयत्न करू शकतात.
लंके या डमी उमेदवाराचे काही ‘वेडेवाकडे’ धंदे आहेत की नाही, हे आम्हाला माहीत नाही. मात्र त्यांच्याआडून महाविकास आघाडीच्या निलेश ज्ञानदेव लंके यांच्यावर आरोप करायचे, हे षडयंत्र यामध्ये असू शकते. त्याचबरोबर निलेश साहेबराव लंके यांना खा. डॉ. सुजय विखे यांना पाठिंबा द्यायला सांगून या निवडणुकीत गोंधळ घालायचा उद्देश खा. डॉ. विखे यांचा असल्याचं फाळके म्हणाले.