राज्याच्या पर्यटन विभागाच्या बँक खात्यातून अज्ञात लोकांनी 67 लाख रुपये चोरले होते. या घटनेला एक महिना पूर्ण झाला नाही, तोच पुन्हा एकदा राज्याच्या शालेय शिक्षण विभागातून अज्ञातांनी 47 लाख रुपये ढापले आहेत. लाखो रुपयांवर डल्ला मारला जात असताना राज्य शासनाच्या या दोन्ही विभागांत नक्कीच चाललंय तरी काय, असा प्रश्न सामान्य जनतेला पडला आहे.
राज्य शासनाच्या शालेय शिक्षण विभागातून 47 लाख रुपये चोरीला गेल्याची धक्कादायक बाब नुकतीच समोर आली आहे. शालेय शिक्षण विभागाचे बनावट स्टॅम्प, चेक आणि स्वाक्षरीद्वारे चार टप्प्यांमध्ये 47 लाख 60 हजार रुपये काढण्यात आले आहेत.
मंत्रालयातल्या बँकेच्या शाखेतून चोरट्याने हे लाखो रुपये काढले असल्याचं जळजळीत आणि तितकंच खळबळजनक वास्तव चव्हाट्यावर आलं असून चार व्यक्तींच्या नावावर ही रक्कम जमा झाल्याची माहिती आहे.
दरम्यान, ही सर्व बँक खाती कोलकाता येथील असून नमिता बेग, प्रमोद सिंग, तप कुमार, झीनत खातून यांच्या बँक खात्यात ही रक्कम जमा झाल्याचं पोलीस तपासात समोर आलं आहे. पोलिसांनी या चौघांविरुद्ध भारतीय दंडविधान कलम 419, 420, 465 467, 471 473, 34 नुसार गुन्हा दाखल केलाय.
