पालघरः पालघर लोकसभा मतदारसंघात ‘परभणी पॅटर्न’ वापरून हा मतदारसंघ बहुजन विकास आघाडीला सोडणार नाहीत; परंतु हा मतदारसंघ जर ‘परभणी पॅटर्न’ प्रमाणे बहुजन विकास आघाडीला सोडला, तर शिवसेना भारतीय जनता पक्षाचे प्रचंड नुकसान होईल, असा इशारा खासदार राजेंद्र गावित यांनी दिला आहे. कोणत्याही परिस्थितीत उमेदवारी आपल्यालाच मिळणार असल्याचा दावा करून मतदारसंघात एक फेरी पूर्ण झाल्याची माहिती त्यांनी दिली.
पालघर लोकसभा मतदारसंघात महाविकास आघाडीने भारती कामडी यांना उमेदवारी दिली आहे; परंतु महायुतीचा उमेदवार अद्यापही ठरलेला नाही. महायुतीत हा मतदारसंघ कोणाच्या वाटेला जाणार, हेही अद्याप निश्चित नाही. अशा पार्श्वभूमीवर बहुजन विकास आघाडीने बोईसरचे आमदार राजेश पाटील यांना उमेदवारी दिली आहे. त्यातच राज्य सरकारला बहुजन विकास आघाडीने यापूर्वी वारंवार सहकार्य केले असल्यामुळे हा मतदारसंघ बहुजन विकास आघाडीला सोडावा अशी चर्चा सुरू झाली आहे.
‘परभणी पॅटर्न’ पालघरमध्ये नाही
याबाबत खासदार गावित म्हणाले, की महायुती हा राष्ट्रीय पक्ष आहे. अशा वेळी पालघर जिल्ह्यापुरत्या मर्यादित असलेल्या स्थानिक आघाडीसाठी हा मतदार संघ सोडला जाण्याची सूतराम शक्यता नाही; परंतु परभणीत जशी राष्ट्रीय समाज पक्षाला जागा सोडण्यात आली, तशी पालघर लोकसभा मतदारसंघात बहुजन विकास आघाडीला जागा सोडण्याबाबत चर्चा सुरू आहे. या चर्चेत काही अर्थ नसला, तरी प्रत्यक्षात मात्र जर बहुजन विकास आघाडीला हा मतदारसंघ सोडला तर शिवसेना, भारतीय जनता पक्षाचे प्रचंड नुकसान होईल असे वक्तव्य गावीत यांनी केले आहे.
पालघरचा तिढा सुटला
पालघर लोकसभा मतदारसंघ अजून कोणाच्या वाटेला गेला हे ठरले नसले, तरी त्याचा तिढा लवकरच सुटेल. नाशिक, पालघर आणि ठाण्याबाबत वरिष्ठ पातळीवर निर्णय झालेला आहे. मतदारसंघ कोणाच्या वाटेला हे ठरले नसले, तरी माझी उमेदवारी निश्चित आहे, असा दावा खासदार गावित यांनी केला. वरिष्ठांनी सांगितलेल्या सूचनेनुसारच आपण मतदारसंघात काम सुरू केले आहे. प्रचाराची एक फेरी पूर्ण झाली आहे. पक्ष कोणताही असला आणि चिन्ह कोणते असले, तरी उमेदवार मीच आहे असे त्यांनी ठामपणे सांगितले.
तूर्त प्रचारावर लक्ष
बहुजन विकास आघाडीला हा मतदारसंघ सोडला आणि आपल्याला उमेदवारी मिळाली नाही, तर काय करणार या प्रश्नावर खासदार गावित म्हणाले, की याबाबत आपण आपल्या वरिष्ठांशी चर्चा करू आणि त्यानंतरच निर्णय घेऊ. तूर्त तरी आपण मतदार संघात बैठका आणि संपर्कावर भर दिला आहे.
