‘चारा घोटाळ्याच्या आरोपावरुन न्यायालयानं ज्यांना शिक्षा ठोठावली, ते बिहारचे लालू यादव आणि काँग्रेस तसंच महाविकास आघाडीचे नेते सामान्य जनतेबरोबर खूप खालच्या पातळीचं राजकारण करत आहेत. स्वतःची ‘व्होट बँक’ मजबूत करण्यासाठी एससी, एसटी, ओबीसी आदींचं संपूर्ण आरक्षण काढून मुस्लिम बांधवांना देण्याचा खतरनाक खेळ महाविकास आघाडी खेळत आहे, असा आरोप देशाचे पंतप्रधान नरेंद्र मोदी यांनी अहिल्यानगरमध्ये (अहमदनगर) बोलताना केला.
नगर दक्षिण लोकसभा मतदारसंघातले महायुतीचे उमेदवार खासदार डॉ. सुजय विखे आणि नगर उत्तर लोकसभा मतदारसंघातले उमेदवार खासदार सदाशिव लोखंडे यांच्या प्रचारार्थ नगरच्या संत निरंकारी भवन मैदानावर आयोजित करण्यात आलेल्या महासंकल्प सभेत उपस्थित लाखो मतदारांना संबोधित करताना ते बोलत होते.
यावेळी उपमुख्यमंत्री देवेंद्र फडणवीस, मंत्री दादा भुसे, भागवत कराड, पालकमंत्री राधाकृष्ण विखे, उमेदवार खासदार डॉ. सुजय विखे, खासदार सदाशिव लोखंडे, माजी मंत्री प्रा. राम शिंदे, माजी मंत्री शिवाजी कर्डिले, आमदार संग्राम जगताप, आमदार मोनिका राजळे, माजी नगराध्यक्ष ॲड. अभय आगरकर, माजी महापौर बाबासाहेब वाकळे आदी उपस्थित होते. काय म्हणाले, पंतप्रधान नरेंद्र मोदी तुम्हीच पहा आणि ऐका…!
