लोकसभा निवडणुकीत महायुतीचे उमेदवार खासदार डॉ. सुजय विखे यांच्या प्रचारार्थ पंतप्रधान नरेंद्र मोदी यांची येत्या मंगळवारी (दि. ७) दुपारी साडेचार वाजता नगर शहरातल्या सावेडी परिसरात असलेल्या संत निरंकारी भवन पटांगणावर सभा होणार आहे. या सभेत पंतप्रधान मोदी कुठल्या मुद्द्यावर बोलतात, याकडे सर्वांचं लक्ष लागलं आहे.
दरम्यान, शेवगाव तालुक्यातल्या बोधेगाव इथं दि. ८ रोजी राज्याचे कृषिमंत्री धनंजय मुंडे यांची सभा होणार आहे. दि. ९ मे रोजी उपमुख्यमंत्री देवेंद्र फडणवीस यांची जामखेड तालुक्यात सभा होणार आहे. त्याच दिवशी कर्जत तालुक्यात उपमुख्यमंत्री अजित पवार यांची सभा होणार आहे. त्याच दिवशी पाथर्डी तालुक्यात आमदार नितेश राणे यांची रॅली काढण्यात येणार आहे.
केंद्रीय रस्ते वाहतूक, महामार्ग आणि जहाज मंत्री नितीन गडकरी आणि केंद्रीय नागरी विमान वाहतूक मंत्री ज्योतिरादित्य सिंधिया यांची श्रीगोंदा तालुक्यात दि. १० मे रोजी सभा होणार आहे. माजी मंत्री पंकजा मुंडे यांची पाथर्डी तालुक्यात सभा होणार आहे.
लोकसभा निवडणूक प्रचाराची सांगता उत्तरप्रदेशचे मुख्यमंत्री योगी आदित्यनाथ यांच्या सभेनं होणार आहे. यानिमित्त नगर शहरात मुख्यमंत्री योगी आदित्यनाथ यांची रॅली काढण्यात येणार आहे. या सांगता सभेत ‘बुलडोझर बाबा’ अशी ओळख असलेले योगी आदित्यनाथ काय बोलणार, याकडे नगरकरांचं लक्ष लागलं आहे.
‘ते’ मतदार भाजपकडे कसे होतील आकर्षित?
नगर शहरातल्या झेंडीगेट, मुकुंदनगर, भिंगार या परिसरातला मुस्लिम मतदार हा लोकसभा निवडणुकीत निर्णायक मतदाराची भूमिका निभावतो. हा मतदार भाजपकडे जास्तीत जास्त कसा आकर्षित होईल, यासाठी भाजपचे केंद्रीय नेतृत्व नेमका कोणता डाव टाकणार, याविषयीदेखील नगर दक्षिण मतदार संघात मोठी उत्सुकता आहे.
