अहिल्यानगरमध्ये बांधण्यात आलेला बहुचर्चित उड्डाणपूल काही ठिकाणी रहदारीसाठी धोकादायक झाला असल्याचा आरोप करत या उड्डाणपुलाच्या बांधकामात कोणी कोणी टक्केवारी खाल्ली, याचा शोध घेऊन या उड्डाणपुलाचं स्ट्रक्चरल ऑडिट करण्यात यावं, अशी मागणी काँग्रेसचे शहर जिल्हाध्यक्ष किरण काळे यांनी केली आहे.
या उड्डाणपुलाचा एका ठिकाणचा भाग कोसळून खाली रस्त्यावर पडला. सुदैवानं संभाव्य जिवितहानी टळली. संबंधितांच्या या बेजबाबदारपणाचा निषेध करत काळे आणि त्यांच्या सहकाऱ्यांनी हा उड्डाणपूल बांधणाऱ्या संबंधित ठेकेदाराविरुद्ध कारवाई करण्यात यावी, अशी मागणी केली.
काळे यांनी या घटनेची दखल घेत नुकतंच ‘फेसबुक लाईव्ह’ करून सरकारी यंत्रणेचं याकडे लक्ष वेधून घेतलं. हा उड्डाणपूल जागोजागी धोकादायक झाला असल्याचं काळे यांचं म्हणणं असून उड्डाणपुलावरची लाइटिंगदेखील बंद असल्याचं ते म्हणाले.
दरम्यान, नगर दक्षिण लोकसभेचे खासदार डॉ. यांनी उड्डाणपुलाच्या कामाचं श्रेय जसं घेतलं, तसं एखादी दुर्घटना घडल्यास आणि त्यावेळी एखाद्याचा मृत्यू झाल्यास त्याचीसुद्धा जबाबदारी खासदार डॉ. विखे यांनी घ्यावी, असं आवाहन काळे यांनी यावेळी केलं.
