पोलीस ठाण्यात दाखल असलेल्या एका गुन्ह्यात प्रतिबंधात्मक कारवाई न करण्यासाठी दीड लाख रुपयांची लाच घेताना रंगेहाथ अटक करण्यात आलेल्या बीडच्या स्थानिक गुन्हे शाखेचे लाचखोर पोलीस निरीक्षक दत्तात्रय सखाराम शिंदे याच्या घरात साठ लाखांचे सोन्या-चांदीचे दागिने, सव्वा लाखांची रोख रक्कम आणि एक कोटी 75 लाखांच्या मालमत्तेची कागदपत्रं असं मोठ्ठं घबाड पोलिसांनी जप्त केलंय. दरम्यान न्यायालयानं पी. आय. शिंदे आणि इतर दोघांना दोन दिवसांची पोलीस कोठडी सुनावली आहे.
पी. आय. दत्तात्रय शिंदेसह हवालदार नितीन आनंदराव मोहने, अशोक साहेबराव पाटील (दोघं राहणार देवपूर, धुळे) अशी पकडण्यात आलेल्या संशयित लासखोर पोलिसांची नाव आहेत.
पी.आय. शिंदेच्या घरात काय काय सापडलंय…?
59 लाख रुपयांची 900 ग्रॅम वजनाचे सोन्याचे दागिने.
दहा लाख रुपयांचे चांदीचे दागिने.
एक लाख 26 हजार रुपयांची रोख रक्कम.
स्वतःसह पत्नी आणि इतर नातलगांच्या नावावर असलेली एक कोटी 75 लाख रुपयांच्या मालमत्तेची कागदपत्रं.
‘अशी’ आहे घटना…!
तक्रारदारांविरुद्ध प्रतिबंधात्मक कारवाई अंतर्गत गुन्हा दाखल न करण्यासाठी पीआय शिंदे यांच्या सांगण्यावरुन इतर दोघांनी दोन लाख रुपयांची लाच मागितली. लाचलुचपत प्रतिबंधक विभागाकडे तक्रार नंतर या विभागानं सापळा रचला. संशयितांनी पंचांसमोर दीड लाख रुपयांची लाच स्विकारली. पंचांनी त्यांना रंगेहाथ पकडलं. या प्रकरणी दोंडाईचा पोलीस ठाण्यात गुन्हा दाखल करण्यात आला.
