अहिल्यानगर (अहमदनगर) जिल्ह्यातल्या नगर तालुक्यात असलेल्या इमामपूर घाटात आज (दि. १८) सकाळी साडे दहाच्या सुमारास भीषण अपघात झाला. या अपघातात नेवासे तालुक्यातल्या खरवंडी इथले अनिल दगडू फाटके हे ठार झाले असून त्यांची मुलगी जखमी झाली आहे.
डांबराची पिंपे छत्रपती संभाजीनगरकडे घेऊन जाणाऱ्या कंटेनरने फाटके यांच्या दुचाकीला धडक दिली आणि हा अपघात झाल्याचं प्रत्यक्षदर्शींनी सांगितलं. या अपघातात मयत झालेले अनिल दगडू फाटके हे त्यांच्या मुलीच्या महाविद्यालयीन प्रवेश प्रक्रियेसाठी नगरकडे जात होते. त्याचवेळी काळानं त्यांच्यावर घाला घातला.
या अपघातात फाटके यांची मुलगी जखमी झाली आहे. अपघाताची माहिती समजताच एमआयडीसी पोलीस ठाण्याचे पोलीस अपघातस्थळी पोहोचले. तातडीने रुग्णवाहिकेला पाचारण करुन जखमी मुलीला आणि तिच्या वडिलांना उपचारार्थ दवाखान्यात नेण्यात आलं. या अपघाता दरम्यान इमामपूर घाटात वाहनांची मोठी गर्दी झाली होती. मात्र पोलिसांनी काही वेळातच वाहतूक सुरळीत केली. या अपघाताने नेवासा तालुक्यात हळहळ व्यक्त करण्यात येत आहे.
