नगर – जामखेड रस्त्यालगतच्या सांडवा फाटा इथं आज (दि. २) दुपारी भर उन्हात एक दुर्दैवी घटना घडली. एका लग्नात हा प्रकार घडला. मंगलाष्टका झाल्यानंतर करण्यात आलेल्या फटाक्यांच्या आतिषबाजीत एक नवी कोरी कार जळून खाक झाली. सांडवा फाटा इथं एका मंगल कार्यालयात आज (दि. २) लग्नाचा सोहळा आयोजित करण्यात आला होता.
मंगलाष्टका झाल्यानंतर नवरदेवाच्या मित्रांनी फटाक्यांची आतिषबाजी केली. या फटाक्यांच्या आतिषबाजीमुळे वाळलेल्या गवतानं पेट घेतला. या ठिकाणी एका झाडाखाली नवी कोरी कार ‘पार्क’ करण्यात आली होती. प्रचंड उन्हात ही आग चांगलीच भडकली आणि क्षणार्धात नवी कार जळून गेली.
दरम्यान, या कारजवळ अनेक वाहनं लावण्यात आली होती. आगीची घटना निदर्शनास येताच ती वाहनं ताबडतोब काढून घेण्यात आली. त्यामुळे पुढील अनर्थ टळला. या घटनेमुळे नव्या कोऱ्या कारच्या मालकाला मात्र लग्नातलं हे विघ्न मनावर दगड ठेवून सहन करावं लागलं.
