पोलीस किती सतर्क असतात, हे पुन्हा एकदा निदर्शनास आलंय. कारण घटनेच्या तब्बल दीड महिन्यानंतर एका प्रकरणात गुन्हा दाखल करण्यात आला आहे. मराठा समाजाचे नेते ‘संघर्ष योद्धा’ मनोज जरांगे पाटील यांची दीड महिन्यापूर्वी वाघोली (पुणे) इथं पहाटे सभा पार पडली होती. या सभेची पोलिसांनी दीड महिन्यानंतर दखल घेत जरांगे आणि त्यांच्या सहकाऱ्यांविरुद्ध गुन्हा दाखल केला.
मराठा आरक्षणाच्या मागणीसाठी जालना जिल्ह्यातल्या अंतरवाली सराटीतून मुंबईला उपोषणासाठी जात असताना जरांगे पाटील यांची पुण्यातल्या वाघोलीत पहाटे सभा झाली होती. या सभेसाठी समन्वयकांनी सभेसाठी लोणीकंद पोलीस ठाण्यात रितसर अर्जदेखील केला होता. पोलिसांनी समन्वयकांना सूचना दिल्या होत्या.
जरांगे पाटील या सभेला पहाटे चार वाजता आले होते. आयोजकांनी विनापरवाना लाऊड स्पीकर लावून सभा घेत कायद्याचं उल्लंघन केलं. म्हणून पुणे पोलिसांनी दीड महिन्यानंतर (दि. ७) जरांगे पाटील त्याचबरोबर गणेश मस्के, संदीप कांबीलकर, शेखर पाटील यांच्यासह आठ ते दहा लोकांविरुद्ध गुन्हा दाखल केला.
