‘मला नको तुमचे हार बुके, नगरमधून मला खासदार पाहिजे फक्त सुजय विखे’, या शिघ्र कवितेनं भाषणाला सुरुवात करुन केंद्रीय मंत्री रामदास आठवले यांनी नगरमध्ये काँग्रेसवर सडकून टीका केली. ते म्हणाले, ‘काँग्रेसचे लोक अनेक वर्षे देशाच्या सत्तेत राहिले. मात्र त्यांना कधी डॉक्टर बाबासाहेब आंबेडकर यांना भारतरत्न द्यावासा वाटला नाही. काँग्रेसने मुस्लिमांच्या मतांचा फक्त वापर करून घेतला आणि मुस्लिमांना वाऱ्यावर सोडलं. मात्र या देशामध्ये सर्व पक्षीय आशिर्वादाच्या जोरावर पंतप्रधान नरेंद्र मोदींचा विजय रथ धावत आहे. हा रथ अडवण्याचा कोणी प्रयत्न केला तर आम्ही त्याला आडवं करणार, असं वक्तव्य केंद्रीय मंत्री रामदास आठवले यांनी केलं.
नगर दक्षिणेतले महायुतीचे उमेदवार डॉ. सुजय विखे यांच्या प्रचारार्थ नगर शहरातल्या मंगलगेट परिसरात आयोजित करण्यात आलेल्या जाहीर सभेत ते बोलत होते. यावेळी नगरसेवक सचिन जाधव, सुनील साळवे, माजी नगरसेवक अजय साळवे आदीसह शिवसेना भाजप आणि आरबीआयचे पदाधिकारी आणि कार्यकर्ते मोठ्या संख्येने उपस्थित होते. यावेळी अनेकांची भाषणं झाली. या जाहीर सभेत केंद्रीय मंत्री आठवले काय म्हणाले, हे तुम्हीच पहा आणि ऐका.
