नाशिक परिक्षेत्राचे नवे विशेष पोलीस महानिरीक्षक दत्तात्रय कराळे यांनी काल (दि.21) अहमदनगरला येऊन पोलीस अधिकाऱ्यांशी संवाद साधला. जिल्हा पोलीस अधीक्षक राकेश ओला यांनी त्यांचं स्वागत केलं. आगामी लोकसभा निवडणुकीसह शिवजयंती आणि डॉ. बाबासाहेब आंबेडकर जयंतीच्या पार्श्वभूमीवर पोलीस अधिकाऱ्यांना त्यांनी काही मौलिक सूचना केल्या. त्यानंतर दुपारी नगरच्या पत्रकारांशी चर्चा केली.
सायंकाळी पाचनंतर आयजी कराळे यांनी अहमदनगरच्या कोतवाली पोलीस स्टेशनमध्ये भेट दिली. कोतवाली पोलीस ठाण्याचे पोलीस निरीक्षक प्रताप दराडे यांनी त्यांचं स्वागत केलं. कोतवाली पोलीस ठाण्याची नवीन प्रशस्त इमारत पाहून आयजी कराळे यांनी समाधान व्यक्त केलं. एसपी ओला यांनी त्यांना माहिती दिली.
त्यानंतर आयजी कराळे यांनी 25 वर्षांपूर्वी कोतवाली पोलीस ठाण्याचा कारभार ज्या गोल घुमटाकार आणि ऐतिहासिक इमारतीमध्ये चालत होता, त्या इमारतीला भेट दिली. त्या गोल घुमटाकार इमारतीत गेल्यानंतर आयजी कराळे यांनी जुन्या आठवणींना उजाळा दिला. एसपी ओला यांना त्यांनी सांगितलं, अमूक ठिकाणी पोलीस निरीक्षकाची केबिन होती. अमूक ठिकाणी ठाणे अंमलदार बसत होते.
तत्कालीन एसपी विश्वास नांगरे पाटील यांनी त्यावेळी केलेल्या काही कामांची माहिती देणारा फलकही त्याठिकाणी होता. तो पाहून आयजी कराळे यांच्या मनात जुन्या आठवणी जाग्या झाल्या. कोतवाली पोलीस ठाण्यातल्या या घुमटाकार इमारतीसह अन्य परिसरात हल्ली काहीशी अस्वच्छता पसरली आहे. नव्या इमारतीमुळे या परिसराकडे दुर्लक्ष होत आहे. हा परिसर पुन्हा एकदा उजळून निघावा, अशी अपेक्षा मात्र आयजी कराळे यांच्या दौऱ्यांनंतर उपस्थितांनी व्यक्त केली.
