राज्यात महाविकास आघाडीचं सरकार असताना भाजपनं नवाब मलिक यांचे दाऊद इब्राहिमशी संबंध असल्याचा आरोप करत प्रचंड विरोध केला होता. मात्र काल (दि. २) झालेल्या राष्ट्रवादी काँग्रेसच्या अजित पवार गटाच्या बैठकीत नवाब मलिक सहभागी झाले होते. त्यामुळे सर्वांच्याच भुवया उंचावल्या.
या पार्श्वभूमीवर काही पत्रकारांनी राज्याचे उपमुख्यमंत्री आणि अर्थमंत्री अजित पवार यांना छेडलं. स्पष्ट, परखड बोलणाऱ्या पण काहीशा फटकळ आणि ‘सनकी’ स्वभावाच्या
अजित पवार यांना पत्रकारांनी मोजक्याच शब्दांत विचारलं, ‘अजित दादा, नवाब मलिक’? अजित पवार उत्तरले, ‘हो, काही त्रास होतोय का’? आता अजित पवार यांच्या या प्रश्नावर पत्रकार तरी काय बोलणार, हाच खरा प्रश्न आहे.
नवाब मलिक पावसाळी अधिवेशनाला आले होते. मात्र त्यांना महायुतीपासून वेगळं बसवण्यात आलं. परंतू काल (दि. २) संध्याकाळी राष्ट्रवादी काँग्रेसच्या बैठकीला नवाब मलिक उपस्थित असल्यामुळे अजित पवार यांनी भाजपवर कुरघोडी केल्याचं बोललं जात आहे.
दरम्यान, नवाब मलिक सोबत आहेत की नाही, याचा खुलासा उपमुख्यमंत्री देवेंद्र फडणवीस यांनी करावा, अशी मागणी विरोधी पक्ष नेते वडेट्टीवार यांनी केली आहे.
