मिरवणूक मार्गावरच्या 45 ठिकाणी 70 सीसीटीव्ही कॅमेरे ; आंबेडकर जयंती शांततेत साजरी करा ; कोतवाली पोलिसांचं आवाहन !
विश्वरत्न डॉ. बाबासाहेब आंबेडकर यांच्या जयंतीनिमित्त आज दुपारी चारनंतर सर्वत्र भव्य अशा मिरवणुका काढण्यात येणार आहेत. या मिरवणुकीत उत्साही, अति उत्साही कार्यकर्ते सहभागी होणार आहेत. त्यामुळे या मिरवणुकीत गडबड होऊ नये, म्हणून पोलिसांनी अत्यंत काटेकोरपणे काळजी घेतली आहे.
अहमदनगर शहरातल्या कोतवाली पोलीस ठाण्याच्या अंतर्गत जयंती मिरवणूक मार्गावरच्या 45 ठिकाणी तब्बल सत्तर सीसीटीव्ही कॅमेरे लावण्यात आलेले आहेत. गडबड, गोंधळ न करता आंबेडकर जयंती शांततेत साजरी करा, असे आवाहन पोलिसांनी केलंय.
डॉ. बाबासाहेब आंबेडकर जयंती शांततेत पार पडावी, यासाठी पोलिस प्रशासन व मंडळांच्या पदाधिकार्‍यांची बुधवारी (दि.12) कोतवाली पोलीस ठाण्यात बैठक पार पडली. पोलीस प्रशासनाकडून काही महत्त्वाच्या सूचना यावेळी मंडळांना देण्यात आल्या. मिरवणुकीच्या पार्श्वभूमीवर पोलिसांचा मोठा बंदोबस्त तैनात राहणार असून सीसीटीव्ही कॅमेरे मिरवणूक मार्गावर बसविण्यात आले आहेत. कोणताही अनुचित प्रकार घडू नये, यासाठी पोलिस प्रशासनाने तयारी पूर्ण केली आहे.
अहमदनगर महापालिकेकडे पत्रव्यवहार करून कोतवाली पोलिसांनी मिरवणूक मार्गावरील बंद असलेले दिवे सुरू करणेबाबत कळविले आहे. त्यावरून महापालिका आयुक्त जावळे डांगेंच्या मार्गदर्शनाखाली कोके यांच्या टीमने बंद असलेले पथदिवे सुरू केले आहेत. तसेच आवश्यक त्या ठिकाणी नवीन पथदिवे लावलेले आहेत.
महाराष्ट्र राज्य वीज वितरण कंपनी यांनासुद्धा पत्रव्यवहार करून मिरवणूक सुरू असताना यंत्रणा सतर्क ठेवणे बाबत कळविलेले आहे. कोतवाली पोलिसांकडून काही महत्त्वाच्या ठिकाणी लाईट गेल्यास स्वतंत्र प्रकाश व्यवस्था केलेली आहे. दरम्यान, गेल्या काही मिरवणुकांपासून कोतवाली पोलिसांनी मिरवणूक पुढे जात असताना अडथळा येऊ नये, वाद होऊ नये, यासाठी पत्र्याचे तसेच लाकडी पक्के बॅरिकेटिंग चांगल्या पद्धतीने करण्यास सुरुवात केलेली आहे. आंबेडकर जयंतीमध्ये सुद्धा पक्के बॅरिकेटिंग करण्यात येत असून जागोजागी आतील बाजूने सुद्धा बॅरिकेटिंग करून बंदोबस्त लावण्यात आला आहे.
गुन्हेगारी पार्श्वभूमी असलेले तसेच वेळोवेळी मिरवणुकांमध्ये व इतर वेळेस वाद केलेले गुन्हे दाखल असलेल्या 86 जणांवर अहमदनगर शहरांमध्ये व परिसरामध्ये प्रवेश बंदी करण्याबाबतचे आदेश प्राप्त करून घेतले आहेत. अशा व्यक्तींना दिनांक 13 एप्रिलच्या रात्री सायंकाळी सहा ते पंधरा एप्रिल सकाळी दहा वाजेपर्यंत नगर शहरांमध्ये प्रवेश बंदी केलेली आहे. हे इसम पोलिसांना मिळून आल्यास त्यांच्यावर कारवाई करण्यात येणार आहे. सोबतच 30 लोकांवर इतर प्रतिबंधक कारवाई केलेली असून 75 लोकांना नोटीस देण्यात आल्या आहेत.
आंबेडकर जयंती ची मिरवणूक शांततेत पार पाडावी सर्व मंडळांच्या काही अडीअडचणी असतील, तर त्या जाणून घेण्यासाठी कोतवाली पोलीस स्टेशन येथे सर्व मंडळाचे प्रमुख तसेच पदाधिकारी इतर पदाधिकारी यांची अपर पोलीस अधीक्षक प्रशांत खैरे उपविभागीय पोलीस अधिकारी अनिल कातकडे तोफखाना पोलीस निरीक्षक मधुकर साळवे यांच्या प्रमुख उपस्थितीत कोतवाली पोलिसांकडून मीटिंग घेण्यात आली. सदर मीटिंगमध्येसुद्धा यापूर्वी ज्या मुद्द्यांवरून वाद झालेला असे मुद्दे टाळून त्याप्रमाणे मिरवणूक शांततेत काढण्यावर चर्चा झाली.
डॉ. बाबासाहेब आंबेडकर जयंतीनिमित्त मोठ्या प्रमाणावर मिरवणुका निघणार असल्याने तगडा बंदोबस्त लावण्यात आलेला आहे. यामध्ये डॉक्टर बाबासाहेब आंबेडकर पुतळा ते दिल्लीगेट पर्यंत पोलीस अधीक्षक राकेश ओला अपर पोलीस अधीक्षक प्रशांत खैरे यांच्या मार्गदर्शनाखाली एक पोलीस उपाधीक्षक, अकरा पोलीस निरीक्षक, 25 पोलीस उपनिरीक्षक, 425 पोलीस जवान, एक शीघ्रकृतिदल, एक एस आर पी टीम अशी यंत्रणा तैनात करण्यात आलेले आहे.
डॉ. बाबासाहेब आंबेडकर यांची मिरवणूक मोठ्या प्रमाणावर निघणार आहे. कोणीही अनुचित प्रकार करत असल्यास किंवा करण्याच्या बेतात असल्यास तात्काळ कोतवाली पोलीस निरीक्षक चंद्रशेखर यादव यांच्या 7777924603 मोबाईलवर संपर्क करून किंवा 112 या क्रमांकावर फोन करून तात्काळ कळवावे, असं आवाहन करण्यात आलं आहे.
