भिंगार मध्ये दोन गावठी कट्टे व दोन जिवंत काडतुस अवैधरित्या बाळगणारा आरोपी जेरबंद; स्थानिक गुन्हे शाखा अहमदनगरची कारवाई…!
अहमदनगर – गावठी कट्टे व जिवंत काडतुस जवळ बाळगणारा एक इसम सौरभनगर, वडारवाडी, भिंगार परिसरात येणार आहे. आता गेल्यास मिळून येईल अशी खात्रीशीर माहिती मिळाल्याने स्थानिक गुन्हे शाखेचे पोलीस निरीक्षक दिनेश आहेर यांनी अधिकारी व कर्मचारी यांचे पथक नेमुन मिळालेल्या बातमीनुसार खात्री करुन कारवाई करण्याबाबत आदेश दिले.
या आदेशान्वये स्थागुशा पथकातील स.पो.नि. हेमंत थोरात, स.फौ. भाऊसाहेब काळे, मनोहर शेजवळ, बाळासाहेब मुळीक, पो.हे.कॉ. विजयकुमार वेठेकर, देवेंद्र शेलार, विश्वास बेरड, पो.ना. विजय ठोंबरे, सचिन आडबल, दिपक शिंदे, पो.कॉ. मेघराज कोल्हे, चा पो.हे.कॉ. चंद्रकांत कुसळकर व अर्जुन बडे अशांनी मिळून मिळालेल्या बातमीचे ठिकाणी नगर पाथर्डी रोड, सौरभनगर, वडारवाडी, भिंगार येथे जावून सापळा लावुन थांबलेले असतांना थोड्याच वेळात एक इसम संशयीतरित्या फिरताना दिसला. पोलीस पथकाची खात्री होताच संशयीतास ताब्यात घेवुन, पोलीस पथकाची ओळख सांगुन त्यास त्याचे नाव गांव विचारले असता त्याने त्याचे नाव 1) सतीश ज्ञानेश्वर मोरे वय 32, रा. सौरभनगर, भिंगार असे असल्याचे सांगीतले. त्याची पंचा समक्ष अंगझडती घेतली असता त्याचे अंगझडतीत दोन (02) गावठी बनावटीचे कट्टे व दोन (02) जिवंत काडतूस असा एकूण 60,400/-रु.किं.चा मुद्देमाल मिळून आल्याने तो जप्त करण्यात आला आहे.
सदर इसम हा सौरभनगर, भिंगार परिसरात दोन (02) गावठी कट्टे व दोन (02) जिवंत काडतूस बेकायदेशिरित्या कब्जात बाळगताना मिळून आल्याने सदर बाबत पोहेकॉ/575 विजयकुमार बाळासाहेब वेठेकर, ने. स्थानिक गुन्हे शाखा, अहमदनगर यांनी भिंगार कॅम्प पोलीस स्टेशन येथे दिलेल्या फिर्यादीवरुन गुन्हा दाखल करण्यात आलेला आहे. पुढील कायदेशिर कार्यवाही भिंगार कॅम्प पोलीस स्टेशन करीत आहे.
सदरची कारवाई मा. श्री. राकेश ओला साहेब, पोलीस अधीक्षक, अहमदनगर, श्री. प्रशांत खैरे साहेब, अपर पोलीस अधिक्षक, अहमदनगर व श्री. अनिल कातकाडे साहेब, उविपोअ नगर शहर, विभाग यांचे सुचना व मार्गदर्शनाखाली स्थानिक गुन्हे शाखेचे पोलीस अधिकारी व अंमलदार यांनी केलेली आहे.
