घातक शस्त्रास्त्रांसह ‘ते’ दोघे घुसले पंतप्रधान मोदींच्या सभेत ; मग काय, पोलिसांनी केली अटक !
पंतप्रधान नरेंद्र मोदी (PM Narendra Modi) यांचा १९ जानेवारी रोजी मुंबई दौरा होता. या दौऱ्या दरम्यानची बीकेसी एमएमआरडीए मैदानावर पंतप्रधान नरेंद्र मोदी यांच्या (PM Modi) जाहीर सभेत व्हीव्हीआयपी कक्षात अनधिकृतपणे घुसलेल्या दोघांना
मुंबई पोलिसांनी अटक केलीय.
त्यातला एक जण NSG जवान असल्याचं सांगत मोदींच्या सभेत VVIP क्षेत्रात घुसला होता. अटक केलेल्या एका व्यक्तीकडे घातक शस्त्र आढळल्यानं खळबळ उडाली होती. कटराम चंद्रगाई कावड आणि रामेश्वर मिश्रा असं या आरोपींची नावं आहेत.
कटराम हा हॉटेल आणि ट्रान्सपोर्टचा कर्मचारी असून तो भिवंडीचा रहिवासी असल्याचं तपासात समोर आलं आहे. पंतप्रधान मोदींच्या सभास्थळी गस्त घालणाऱ्या कटराम कावड (वय ३९) याच्यावर पोलिसांना संशय आला. त्यावेळी त्याला थांबवून त्याची चौकशी केली.
पोलिसांना त्याच्याकडे स्मिथ अँड वॅगन स्प्रिगफिल्ड रिव्हॉल्व्हरसह चार राऊंड सापडले. त्याच्याकडे या रिव्हॉल्व्हरचा परवाना आहे. त्याच्यावर गुन्हा दाखल करण्यात आला आहे. दरम्यान, पोलिसांनी सभा स्थळावरुन आणखी एका व्यक्तीला अटक केली. तो NSG जवान असल्याचे सांगत होता. रामेश्वर मिश्रा नावाच्या हा व्यक्ती मोदी सभास्थळी पोहचण्याच्या ९० मिनिटांपूर्वी आला होता.
NSG चा तो नायक पदावर असल्याचा दावा करत होता. तो अत्याधुनिक सुरक्षा असणाऱ्या व्हिव्हिआयपी परिसरात घुसण्याचा प्रयत्न करत होता. मुंबई पोलिसांना त्यांच्यावर संशय आला. त्यानंतर त्याची चौकशी सुरु केली.
मुंबई क्राइम ब्रँचच्या (Mumbai Crime Branch) अधिकाऱ्यांनी ही कारवाई केली. सुरक्षित क्षेत्रात प्रवेश करण्यापूर्वी तो इकडे तिकडे फिरत असल्याने गुन्हे शाखेने त्याच्यावर अर्धा तास नजर ठेवली होती. त्याच्याकडे १३ जानेवारीला जारी केलेले बनावट ओळखपत्र मिळाले. परंतू ओळखपत्राच्या रिबिनवर दिल्ली पोलिस लिहिलं आहे.
पोलिस चौकशीदरम्यान, आरोपी दावा करत होता, की तो एनएसजीच्या पठाणकोट हबमध्ये पोस्टिंगवर आहे. मात्र मुंबई पोलिसांनी तपास केला असता त्याचा आयडी बनावट असल्याचं निष्पन्न झालं. आरोपी मिश्राविरुद्ध भादंवि कलम १७१, ४६५, ४६८ आणि ४७१ नुसार गुन्हा दाखल करण्यात आला आहे. त्याला शुक्रवारी वांद्रे न्यायालयात हजर करण्यात आले. न्यायालयानं त्याला 24 तासांची पोलीस कोठडी सुनावली.
