केळ्यांच्या आडून कोट्यवधींच्या कोकेनची तस्करी ; पोलिसांनी असा लावला छडा !
एका कुत्र्यामुळे पोलिसांनी अंमली पदार्थांचा मोठा साठा जप्त केला आहे. इक्वेडोरमधून आयात करण्यात आलेल्या केळ्यांमध्ये अंमली पदार्थांचा साठा लपवण्यात आला होता. कुत्र्यानं हा साठा शोधून काढला.
कुत्र्याच्या हुशारीमुळे पोलिसांनी तब्बल २ हजार ७०० किलोचे अंमली पदार्थ जप्त केले. हा संपूर्ण साठा ७० टन केळ्यांमध्ये सापडलाय. पोलिसांनी जप्त केलेल्या कोकेनची आंतरराष्ट्रीय बाजारातली किंमत ९० कोटी डॉलरच्या म्हणजे ७ हजार २०० कोटी रुपयांच्या आसपास आहे.
७० टन केळ्यांमध्ये लपवून अंमली पदार्थांचा साठा इटलीमार्गे अर्मेनियाला पाठवला जात होता. दोन कंटेनरमधून हा साठा गियोइया ताऊरो बंदरात पोहोचला. त्याबद्दल पोलिसांना संशय आला. त्यांनी कंटेनर्सची तपासणी करण्याचा निर्णय घेतला. केळ्यांची निर्यात करणाऱ्या कंपनीनं याआधी कधीच इतक्या मोठ्या प्रमाणात कोणत्याच फळांचा साठा इतर देशात पाठवला नव्हता. त्यामुळे पोलिसांचा संशय वाढला. पोलिसांनी जोएल नावाच्या कुत्र्याच्या मदतीनं तपासणी सुरू केली. जोएलनं केळ्यांच्या घडांमधून कोकेनचे खोके शोधून काढले.
जोएल कंटेनरच्या जवळ जाताच लगेच वर चढला. त्यानंतर तो केळ्यांचे घड भरभर बाजूला सरकवू लागला. जोएलनं अंमली पदार्थांचा साठा पकडला नसता, तर कोकेनने भरलेले खोके इटलीहून जॉर्जियाला आणि तिथून पुढे अर्मेनियाला पोहोचले असते.
गियोइया ताऊरो बंदरात २०२१ पासून आतापर्यंत अधिकाऱ्यांनी ३७ टन कोकेन पकडलं आहे. त्याची आंतरराष्ट्रीय बाजारातील किंमत हजारो कोटींच्या घरात आहे. इक्वेडोरसह दक्षिण अमेरिकेतल्या अनेक देशांसह जगभरात अंमली पदार्थांची तस्करी करतात.
आमच्या जास्तीत जास्त बातम्या वाचण्यासाठी ‘महासत्ता भारत’ हे फेसबुक पेज लाईक करा…
